图：香港总商会举办第六届免费乘搭电车渡轮日，启动仪式寻日朝早喺西环屈地街电车厂举行 今日时报摄
香港总商会寻日庆祝创会155周年，举办第六届免费乘搭电车渡轮日，请全港市民免费搭电车同天星小轮，香港总商会主席吴天海话，举办今次活动係为咗答谢全港市民多年来对商界同商会嘅支持，唔少市民都因为呢个活动改以电车代步。
活动嘅启动仪式寻日朝早喺西环屈地街电车厂举行，主席吴天海、总裁袁莎妮、多位理事同各会员公司代表都有出席。吴天海喺活动启动仪式致辞嗰阵话，总商会成立咗155年，一直服务香港，就好似电车同渡轮一样係香港嘅中流砥柱，同香港一齐经历咁多年嘅高低起伏。吴天海又话，总商会嘅会员相当具代表性，为香港提供差唔多三分一嘅劳动人口职位，今次请市民免费搭电车同渡海小轮嘅活动有五十几间机构同企业支持。总商会成员喺仪式完结之后就摇响手上嘅传统电车铃铛，四架载住总商会成员嘅电车就由电车厂浩浩蕩蕩咁出发喇！
郑晴上次去呢个活动嘅记者发布会嗰阵话过会出嚟游下「电车河」，我无走数。由西环搭到金钟，再由金钟搭到北角，两程车同经过嘅每架电车都企满晒人！郑晴喺电车见到一位妈妈带住囝囝一齐搭电车，囝囝问妈妈点解可以免费搭车，妈妈听完仲教小朋友要多谢总商会请搭车，由此可见，商会嘅努力真係有市民欣赏㗎！
下一篇：：人人做义工促社会共融/高松杰