颜汶羽扮文青朝圣艺术货柜屋「打卡」

图：Frankie扮文青喺屯门太平清醮活动绘画嘅货柜前影相

货柜市集热潮席捲亚洲，早排元朗就打造咗14个限定艺术货柜屋，希望以元朗同屯门为主题宣扬本土文化，发掘出连港人都几乎遗忘嘅乡间旧事，仲成为不少文青影「沙龙」嘅热门景点。就连青年民建联主席、观塘区议员颜汶羽（Frankie）都唔例外，忍唔住扮文青去「朝圣」，仲Chok住样喺以屯门太平清醮活动绘画嘅货柜前影相，加埋Hashtag话觉得自己chok得几好睇。

Frankie话，呢个市集嘅卖点主打地区文化特色，周末会有不定期音乐会同工作坊，虽然呢个宣传本土文化嘅方法好「贴地」，吸引好多文青去打卡影相。 不过佢就觉得个市集好奇怪，因为呢度唔单止无嘢食，仲无嘢卖，更加无指示牌，令人行都唔知点行。Frankie建议，除影相之外，如果有多啲活动再配合宣传，应该可以增加市集吸引力同人流，仲希望如果日后有机会，可以喺观塘开返个货柜市集。不过郑晴提提你，元朗呢个货柜市集去到今个月23日就结束，各位文青「打卡」呃like记得要趁早。