图：候任特首林郑月娥寻日到将军澳单车馆，帮香港嘅运动员打气。林太喺赛后慰问Sarah，合照留影
寻日係场地单车世界锦标赛2017最后一日赛事，将军澳嘅香港单车馆气氛，仲热过街上嘅气温。候任行政长官林郑月娥都亲自去赛场，帮香港嘅运动员打气。「牛下女车神」李慧诗（Sarah）喺最后嘅女子凯林赛虽然大热倒灶，但喺争先赛成功夺得铜牌，而佢嘅表现亦一早赢尽港人掌声。
慰问李慧诗 担心压力大
林太喺赛后都有特登去慰问Sarah。Sarah话，林太问佢攰唔攰同有无压力，又话好开心比赛有咁多观众睇，林太自己都有买飞支持，佢仲话希望Sarah继续努力，同会留意Sarah之后有咩比赛。而Sarah都话自己有少少攰，因为已踏入比赛最后一日，但认为自己已经尽咗全力表现香港人精神，感谢大家对佢嘅支持。
其实郑晴知道，林太一直都好支持本地体育发展，好似佢参选特首时，香港单车代表队总教练沈金康亦有拍片支持林太，提到2006年多哈亚运会时同林太建议政府应兴建一个单车馆，而今日比赛嘅香港单车馆，正正就係当年林太同佢倾完之后宣布兴建嘅！
郑晴
下一篇：：难逃验车官「法眼」