70见证人忆述九七回归情景

图：新书序言由香港特区首任行政长官董建华撰写

国家主席习近平视察香港三天，令香港庆祝回归二十周年嘅气氛更加热烈。话时话，二十年前回归嘅情景係点呢？当年解放军驻港部队又点样喺1997年7月1日凌晨零时从英军手上接管香港防务呢？

如果有亲历其境嘅朋友亲述当年种种，你话几好呢？啱啦，真係有七十几位历史见证人，写低佢哋亲历、亲见、亲闻嘅回归故事。呢本新鲜出炉嘅书就係《紫荆花开映香江》喇，序言由香港特区首任行政长官董建华撰写。

时任深圳警备政委曹绍业就忆述咗当年驻港部队分两批四路入境嘅情形。佢仲讲咗段小插曲，空军直升机部队原定由广州直飞香港，由于天降暴雨，经请示总部而调整至7月1日早晨八点起飞入香港。

郑晴愈睇愈过瘾，原来多位中联办前领导都有撰文呀。讲过「香港是一本很难读懂的书」嘅姜恩柱，细述「新华社香港分社」点样喺2000年1月18日更名为「中央人民政府驻香港特别行政区联络办公室」嘅来龙去脉，而呢位新华社香港分社社长嘅身份，亦改为中联办首任主任啦。

中联办首任副主任之一嘅王凤超都有撰文《我所见证的七份中英外交函件》。书中爆料，回归前一年，末代港督彭定康先至公开承认「他的顾问」睇过七封函件，而彭定康自己竟然无睇过，难怪王凤超都话费解。讲开又讲，王凤超啱啱出咗本《香港政制发展历程（1843-2015）》，真係一份送畀香港嘅好有心同好有意义嘅回归礼物。