怪兽家长发律师信挑战校规

图：网上近日流传，有怪兽家长向学校发出律师信

讲起读书时期畀训导主任检查校服，例如内衣係咪白色、有无裙内着运动裤打底、对袜有无标誌，真係唔少人嘅集体回忆。网上近日流传，有怪兽家长向学校发出律师信，要求校方检查子女校服时，只可目测，如果要搜身睇内衣、量度裙长度，必须事先知会兼有家长授权。有网民留言嘲笑呢位家长：「咁唔信间学校，不如退学啦！」

事源「90后教师决战怪兽家长」Facebook专页，有自称双班主任之一嘅老师发帖，上周五开学，循例派发一堆通告，点知寻日收到家长嘅律师信，内容全英文，兼引用法律条文、教育局行政指引、个人资料私隐、性别歧视条例等，列出多项要求。除咗查校服，信内仲要求，学生行出校园，就唔受训导规限，例如「不可回到校内之后，话你前日去了哪裏哪裏，又穿校服，又影响校风，要记小过」；除非有家长授权，否则学生名字、照片唔可以放喺学校网页、学校印刷品上宣传。

律师信注明，老师必须七日内回应，否则视为同意条款。呢位老师唔知点处理，求救完校方，仲打电话问呢位家长，对方话对学校通告有意见，所以由律师处理，仲叫老师联络律师喎……

郑晴同资深校长林日丰倾过，佢话从事教育33年，从未听闻家长为咗检查校服而向学校发律师信，慨叹家长行为真係「日新月异」。佢认为，家长出律师信一刻，已经破坏家校关係，等同划清界线，「学校或老师唔会针对小朋友，但事件一传开去，好难掩住其他人把口！」佢反问：「将来小朋友投入社会工作，家长又会唔会向公司发律师信，要求多多呢？咁究竟係帮佢，定係害佢？」