哈啰喂「鬼门关」下月打开\郑晴

图：游走「罪恶之城」九龙城寨内的横街窄巷，提防以厉鬼姿态再现的昔日黑帮、罪犯及黄绿医生来袭

「乾坤一开，三七气流一转……」啱啱大步槛过「鬼节」，意味仲有一个月时间，海洋公园年度盛事哈啰喂全日祭即将开「鬼门关」。想知今年11个哈啰喂景点、12种独特体验有咩牛鬼蛇神出没？哗哗！郑晴寻日率先体验其中三个，剧透过你知喇！

海洋公园哈啰喂今年新推嘅「城寨惊魂」，以昔日「三不管地带」九龙城寨为场景主题。任职场景製作超过30年嘅鲁德义话畀郑晴知，今次鬼屋最特别係将楼高14呎嘅空间，打造成昔日嘅密集楼房。游客沿狭窄小巷逐步走入，途中会听见飞机引擎声，抬头睇吓有无飞机準备降落启德机场时，小心被吓亲！皆因城寨内嘅住客、黑道、妓女、怪医等已化成厉鬼，流连旧式唐楼内，走入牙医诊所、妓院，随时变成「下一个受害者」咁话！

慌宅主人 唧脓疮当酱料食

採用中式元素嘅仲有「殭尸森冢」，夜幕低垂，走入古式庙宇，唔好乱行踩亲骨灰龛，仲要提防中式殭尸来袭。「慌宅17」就有别于一般迷宫式鬼屋，裏面四间密室有唔同嘅恐惧体验，要数最令人噁心嘅，一定係全身布满脓疮嘅慌宅主人，用佢身上唧出嘅脓疮当酱料食，你又敢唔敢摆入口？

郑晴寻日同一班行家率先体验时，就算重複喺同一场景影相，一大班人都被吓无数次。自问大胆嘅你，今年不妨入场试试。记住啦，海洋公园哈啰喂喺下月五日至三十一日期间、16个指定日子举行。留意时辰，错过咗就想去都无得去咯。