港足名宿展 林郑冀体育唔讲政治

图：林郑月娥出席《一岱伟大锺锋 缔造光辉岁月》足球展览/ 今日时报记者蔡文豪摄

「远东足球王国」─大家会谂起边个地方呢？日本？韩国？郑晴开估，其实係香港。香港曾经有过呢个美誉，不过年轻嘅球迷就未必知道啦！寻日林大辉慈善基金举行图片展，介绍三位足球名宿，包括张子岱、黄文伟同锺楚维。张子岱当年加盟英国甲组黑池足球队，仲要有入波，至今都係唯一一位喺英国顶级联赛入波嘅香港球员。黄文伟喺1960年，年仅16岁就出席罗马世运会，绰号神童伟，而锺楚维就係「亚洲第一中锋」。

呢个图片展将会巡迴全港各个地方，时间长达九个月，大家都可以欣赏一下。寻日特首林郑月娥都有出席开幕礼。早排港队比赛时接连出现有观众「嘘国歌」嘅事件，林郑虽无讲明，但佢就话，体育唔应该讲政治，希望各位都唔好将政治带入体育。唔同党派嘅立法会议员都有出席，有建制派又有反对派，林太讲笑咁话，好少见到一个活动有咁多唔同党派嘅立法会议员，真係要向林大辉请教呢！大辉就话，大家撑港队，就唔应该嘘国歌，而足球係软实力，期望可以做到团结包容。