黄丝欲一家三口移民　连登爸不捨10万「粮支」

依然有唔少黄丝对移民充满幻想，一名港爸于「连登讨论区」发文搵人围炉，话自己与太太月入共约10万，育有一名4岁儿子，近日见人移民就想移埋一份，但就担心移民后，会高不成低不就，「30中先走要同班后生争，竞争力本身都差啲，人工仲要减一大截」喎。有网民就揶揄佢无钱学人移民，「一家三口百几万，个细仲要读书，其实真係无得慢慢搣」、「你得一球，一家三口过去，当半年适应期未搵到野做，起码都冇左一半」。

该名港爸以「有无人放唔低香港份粮?」为题发文，话自己没有专业资格，毕业后好彩入到大公司累积经验，「之后15年转咗4次工」，现在每月搵6.5万元，太太亦有4万元收入，形容两人收入好好，但就未有置业，「储落百几万买楼就一铺清」。他分析好多移民的人，有的是后生仔在香港收入不高，没有心理压力;有的是拥有专业资格，到外国都会易啲做回本行;亦有身家富裕可半退休打工。

港爸与太太商量后谂咗3个方案出嚟，一是其中一个先跟儿子到外国，另一个做「太空人」10年后才团聚，但就怕错过个仔嘅成长，将来同阿仔关系可能疏远;二是唔理咁多全家一齐移民，「洗大饼超市执货应该可以生活」，但又变咗低下阶层，会影响儿子的将来;最后方案是继续留港。