跨党派饭局 只联络感情

近年建制派同「泛民」喺立法会嘅关係剑拔弩张，建制派「班长」廖长江、民建联主席李慧琼及自由党党魁锺国斌等早前筹划嘅跨党派饭局，寻日敲定呢个周四中午举行。据悉民建联副主席陈克勤、经民联副主席林健锋、工联会副会长黄国健、新民党主席叶刘淑仪以及民主党主席胡志伟、公民党党魁杨岳桥、专业议政召集人郭荣铿等已答应出席，但不包括「本土派」议员。

唔少人都觉得今次係双方缓和关係同建立恆常沟通机制嘅好机会，不过当事人就表现得十分审慎。廖长江强调饭局只是「一次性」，「唔係外面咁谂」。李慧琼话，市民期望立法会不同党派「多啲对话，少啲对立」，盼饭局係一个好嘅开始。锺国斌亦都话，会面唔会有前设同议题，如果合拍就可以恆常化，但如果大家感觉一般，就未必会有下一次啦。