陈健波鼓励年轻人发展个人兴趣 行行出状元

今日时报网5月9日讯（记者龚学鸣）升唔到大学係咪会无前途呢? 好多香港人都係咁谂，但做人唔应该咁悲观嘅。正所谓行行出状元，保险界立法会议员陈健波寻日喺facebook发短片，话唔锺意读书嘅年轻人都好多出路，佢要介绍嘅就係中华煤气工程学院。工程学院毕业生阿霖就话，佢係第一届DSE考生，成绩唔好，希望有一门手艺，所以选择燃气课程。虽然其他同学可能选择读副学士谂住驳入大学，但佢觉得一门手艺可以养妻活儿都唔错呀。

气体燃气要读三年，头一年就要喺学校上堂。如果表现好，第二、三年就有机会到煤气公司做学徒，最终通过考核，就可以注册做一至八类气体装置技工，正式成为师傅，月薪都有万二到万五蚊架，同大学起薪点差唔多。中华煤气工程学院高级训练主任陈志伟就话，如果表现好，肯增值自己，有好大发展空间。好多管理层，例如工程师、工程监督，都係学院嘅毕业生。波哥仲话，除咗煤气公司，都有好多机构提供同就业挂勾嘅课程嘅。年轻人最紧要走有兴趣嘅路，读书唔读书唔係重点。只要努力，行行出状元。