高永文讚登峰勇士精神可嘉

图：高永文（中）昨与勇攀珠峰的吴俊霆（左二）和两位攀爬至珠峰基地营的肾脏移植康复者黄炎华（右一）和陈国明（右二）

两港人勇闯珠峰嘅喜讯，令大家非常鼓舞。同时另外两名肾脏移植康复者亦成功克服咗身体障碍，登上珠峰基地营，为香港器官捐赠打下「强心针」。食物及卫生局局长高永文寻日同本港「成功登上珠峰第七人」吴俊霆、肾脏移植康复者陈国明和黄炎华会面，高局长讚扬三人敢于挑战自我，喺大自然严苛环境下，仍可克服重重困难，精神可嘉。

原来，高局长都锺意行山，2007年行过香格里拉茶马古道，佢仲透露去到3500米时，觉得头痛，要立即撤离，之后发现脑部有啲异常，需要做手术。

郑晴听闻，吴俊霆将会製成「珠峰梦——敢想人生」嘅影片，将勇攀珠峰嘅励志故事，喺7月22日作慈善放映，全部收入将捐赠香港移植运动协会。高局长感谢佢哋嘅善举，又呼吁大家继续为器官捐赠活动努力，协助等紧器官移植嘅病人可以得到重生嘅机会。

而本港首位成功登顶珠峰女性曾燕红，寻日再次回答「见死不救」嘅质疑，形容有关质疑就好似「责怪一个唔识游水嘅人，（点解）唔救一个遇溺嘅人」。佢话，途中知道有一个印度人跌落山谷，需要超过四个最TOP嘅雪巴人，用咗四日时间，先至能够将印度人尸体搬落山，而四个雪巴人都面临住五成嘅死亡风险。